Eid Ka Tohafa

عید کے چاند پہ سوچا اسے کیا دوں تحفہ
میں نے سوچا تو بہت دور نکل کر سوچا


پہلے میں نے سوچا کہ اسے چاند کا ہالہ بھیجوں
پھر یہ سوچا کہ میں اشک کا پیالہ بھیجوں


میں نے سوچا کہ اسے صبح درخشاں بھیجوں
پھر یہ سوچا کہ اسے زخم گلستاں بھیجوں


میں نے سوچا کہ حسیں چھاؤں کے منظر بھیجوں
پھر یہ سوچا کہ غموں کے اسے ساگر بھیجوں


میں نے سوچا کہ شفق کی اسے سرخی بھیجوں
پھر یہ سوچا کہ دلِ زار کی کرچی بھیجوں


میں نے سوچا کہ حنا کی اسے خوشبو بھیجوں
پھر یہ سوچا کہ لرزتا ہوا آنسو بھیجوں


میں نے سوچا کہ اسے کوئی فسانہ بھیجوں
پھر یہ سوچا کہ اسے خواب سہانہ بھیجوں


کیا عجب اس نے مجھے یاد کیا بھی ہو بہت
کیا عجب وہ بھی ترسی ہو مری قربت کو


کیا عجب مجھ کو لوٹا دے میرے رنگ سبھی
کیا عجب وہ بھی مجھے بھول نہ پائی ہو ابھی


اور دعا کے لئے پھر ہاتھ اٹھا کر اس نے
میرے بارے میں بہت دیر تو سوچا ہوگا


پھر اسے ترک تعلق کا ہوا ہوگا خیال
اپنے چہرے پر لئے گرد ملال


چاند اس نے بھی پوری طرح دیکھا کہ نہیں
پہر کامل کی طرح ٹوٹ کے بکھرا کہ نہیں


تحفہ میں دے نہ سکوں گا یہی سوچا میں نے
عید شاہین منائی بھی تو تنہا میں نے